مفيهوش أي قصة نجاح ملهمة، ولا كفاح يشدك، ولا كواليس كورة هتعمل بووم، ولا نصايح تنمية بشرية.. متقلقش... الكتاب ده ببساطة شديدة، شوية آراء وخواطر من بني آدم... بني آدم عادي جدا زيه زيك.. يمكن تلاقي نفسك في اللي مكتوب، ويمكن لا .. يمكن تتفق، ويمكن تختلف.. وممكن كمان تكون رؤيتك انت أصوب من رؤيتي.
أنا مش كاتب، ولا بعتبر نفسي مؤهل أعلم حد أي حاجة... الفكرة كلها إني كتبت عشان أفتكر .. وعشان ولادي لما يحبوا يعرفوا أبوهم كان بيفكر ازاي يلاقوا كتاب.
ويمكن كمان وانت ماسك الكتاب ده تسأل نفسك: «لاعب كورة وكتاب؟!.. إيه علاقة ده بده؟!».
أهو ده بقى سر الحكاية.. الحياة ساعات تمشي عكس اللي متخيلينه.. زي باص غلط يفتح طريق للجول، أو جول عكسي يقلب الماتش كله.. يمكن الكتاب ده يكون الباص الغلط اللي طلع صح.. أو الجول العكسي اللي يغيّر فيك حاجة ما كنتش متخيلها .
باختصار .. لو محتاج لحظة هدوء.. لحظة تفكير وسط دوشة الحياة.. يمكن تلاقي هنا حاجة تشبهك.
شريف إكرامي